Cuideoidh do fhreagra ar an gceist seo linn léargas a fháil ar na cineálacha éagsúla áiteanna cónaithe atá i do cheantarsa.  Cuirfidh sé ar ár gcumas anailís a dhéanamh ar na cineálacha cóiríochta atá ag daoine ó thaobh aoise, náisiúntachta, an méid oideachais atá orthu, srl.

Cuirimid an cheist seo chun go mbeifear ábalta léargas níos fearr a fháil ar chomh sean is atá áiteanna cónaithe.  Cuirfear faisnéis mhionsonraithe ar fáil maidir leis an stoc tithíochta de réir ceantair bhig agus na bliana a tógadh iad, faisnéis atá de dhíth chun go mbeidh tuiscint againn ar sholáthar agus ar riachtanais tithíochta na hÉireann. 

Cuideoidh na freagraí a thabharfar ar an gceist seo chun athruithe agus treochtaí a aithint i dtaobh líon na ndaoine a bhfuil úinéireacht acu ar a n-áit chónaithe agus iad siúd bhfuil sí ar cíos acu.  Is gné thábhachtach í seo chun léiriú a fháil ar dhálaí geilleagracha agus sóisialta sa tír.

Tabharfaidh do fhreagra ar an gceist seo faisnéis dúinn maidir leis an méid a ghearrtar do chíos i do cheantar agus cuideoidh linn léiriú soiléir a fháil ar chostais chíosa trí chéile. Cuideoidh sin linn tuiscint níos fearr a fháil ar shaincheisteanna ríthábhachtacha ar nós inacmhainneacht cóiríochta ar cíos agus an teacht atá uirthi.

Ach freagraí a fháil ar an gceist seo, beimid in ann comparáid a dhéanamh idir an oiread seomraí atá ar fáil do líonta tí ina n-áit chónaithe.

Is cuid mhór den úsáid a bhainimid as fuinneamh trí chéile an úsáid a bhainimid as fuinnimh sa bhaile agus an cineál foinse fuinnimh a úsáidimid.  Tríd an bpríomhchineál breosla a úsáidtear i d'áit chónaithe a chur in iúl dúinn, cuideoidh tú linn tuiscint a fháil ar an dul chun cinn atá á dhéanamh chun ár spriocanna náisiúnta fuinnimh agus athraithe aeráide a bhaint amach.

Is ceist nua í seo.  Tá úsáid a bhaint as foinsí in-athnuaite fuinnimh ag éirí níos tábhachtaí i dtaobh mar a chuirtear teas agus leictreachas ar fáil inár n-áiteanna cónaithe.  Le freagra(í) a thabhairt ar an gceist seo, beidh tú ag cuidiú le lucht déanta beartais sa réimse seo a chur ar an eolas faoin staid reatha náisiúnta.

Cuideoidh do fhreagra ar an gceist seo linn léiriú a fháil ar an teacht atá ar sheirbhísí soláthair uisce riachtanacha agus an úsáid a bhaintear astu.

Cuideoidh an fhaisnéis seo linn tuiscint shoiléir a fháil ar na seirbhísí sláintíochta atá in úsáid in áiteanna cónaithe na tíre.

Ach freagraí a fháil ar an gceist seo, beidh léargas sonraithe againn ar líon na gcarranna atá ar fáil do líonta tí in Éirinn.

Tá sé ag éirí níos tábhachtaí dúinn, i ngnáthimeacht an tsaoil, go mbeadh teacht againn ar sheirbhísí leathanbhanda, lena n-áirítear san áit chónaithe. Teastaíonn an fhaisnéis seo uainn chun tuiscint a fháil ar an teacht atá ar na seirbhísí seo i do cheantar agus ar fud na tíre.  Tá nuashonrú déanta ar an gceist seo chun aird a thabhairt ar athruithe ar na bealaí a ndéanaimid ceangal leis an idirlíon, chomh maith leis na gairis a úsáidimid chuige seo.  Cuideoidh do fhreagra linn tuiscint níos fearr a fháil ar na hathruithe céanna.

Is ceist nua í seo. Aithnítear aláraim deataigh atá ag obair ar cheann de na príomhnithe a chuideoidh le dóiteáin agus díobháil ó dhóiteán a laghdú.  Cuideoidh freagraí ar an gceist seo linn an úsáid a bhaintear as aláraim deataigh inár n-áiteanna cónaithe a mheas.

Is í cuspóir na ceiste nua seo ná tuiscint níos fearr a fháil ar an úsáid a bhaintear as ár dteanga dhúchais i measc teaghlach nó líonta tí.

Sin deireadh leis na ceisteanna faoi do líon tí.  Freagair anois le do thoil na ceisteanna maidir leis na daoine i do líon tí.

Iarraimid ort ainm gach duine sa teach/sa teaghlach a thabhairt chun a chinntiú go bhfuil gach duine atá ansin ar an oíche san áireamh sa daonáireamh, agus go ndéantar sonraí cruinne gach duine a thaifeadadh.  Baintear úsáid freisin as ainmneacha chun cuidiú le grúpaí teaghlaigh laistigh de theaghlaigh a aithint.  Mar aon leis na sonraí eile ar fad a chuirtear ar fáil don CSO, coinneofar na sonraí seo faoi rún agus ní úsáidfear iad ach amháin chun críocha staidrimh.

Déantar anailís ar beagnach gach faisnéis a bhailítear ar an bhfoirm daonáirimh de réir ghnéas agus aoise.

Tá sé tábhachtach eolas a bheith againn ar phróifíl aoise an daonra i dtaobh na seirbhísí a theastaíonn uainn ar fad a phleanáil agus a sheachadadh - seirbhísí oideachais, sláinte agus leasa shóisialaigh mar shampla. 

Trí chaidrimh teaghlaigh/eile sa teach a aithint, cuidíonn tú linn tuiscint níos fearr a fháil ar an athrú atá ag teacht ar theaghlaigh. Beimid in ann torthaí a chur ar fáil ar phátrúin shóisialta agus cónaithe atá ag athrú a mbaintear úsáid astu chun seirbhísí tithíochta agus leasa shóisialaigh a phleanáil agus a sheachadadh.

Níor cheart ach do dhaoine atá 15 bliana d'aois nó níos sine an cheist seo a fhreagairt.  Ba chóir do dhaoine atá i bpósadh comhghnéis tic a chur le 'pósta' ar an bhfoirm daonáirimh.  Cuideoidh do fhreagra ar an gceist seo linn an t-athrú atá tagtha ar stádas pósta an daonra a aithint agus a thuiscint, athrú ar líon na ndaoine atá singil/pósta/ ina mbaintreach mar shampla.

Cuirfidh do fhreagra ar an gceist seo faisnéis ar fáil dúinn a chuideoidh linn tuiscint níos fearr a fháil ar phátrúin imirce, laistigh de bhailte, chathracha agus chontaetha na tíre agus as tíortha eile go hÉirinn.

Cuiridh do fhreagra ar an gceist seo ar an eolas muid faoi líon na ndaoine atá ina gcónaí i ngach baile fearainn, baile, cathair agus contae.  Is faisnéis thábhachtach í seo d'údaráis áitiúla agus do sholáthróirí seirbhíse poiblí eile. Is air sin freisin a shocraítear teorainneacha toghlimistéir. 

Is ceist nua í seo a chuideoidh linn athruithe ar thionacht tithíochta a aithint go háirithe an líon daoine a bhfuil úinéireacht acu ar a n-áit chónaithe i ngach ceantar nó a bhfuil a n-áit chónaithe ar cíos acu.  

Cuideoidh an cheist seo le soiléiriú a thabhairt ar líon na ndaoine a bhog laistigh d'Éirinn/a tháinig go hÉirinn le bliain.

Tabharfaidh freagraí ar an gceist seo, in éineacht leis na ceisteanna maidir le háit chónaithe agus an áit ar chónaigh daoine bliain ó shin, léargas sonraithe ar imirce. Beimid ábalta, ach go háirithe, anailís a dhéanamh ar cé a tháinig go hÉirinn ó bhí an daonáireamh deiridh ann.

Tá faisnéis daonáirimh ar líon na ndaoine de náisiúntachtaí éagsúla chomh maith le sonraí maidir leis an áit a bhfuil cónaí orthu, a n-aois, a n-inscne, stádas eacnamaíochta srl.  de dhíth ó eagraíochtaí agus soláthraithe seirbhísí áitiúla agus náisiúnta agus bíonn siad ag brath ar an bhfaisnéis sin.

Is cuid thábhachtach den daonáireamh an fhaisnéis ar eitneacht an daonra.  Faoi reachtaíocht comhionannais in Éirinn tá idirdhealú bunaithe ar roinnt foras in aghaidh an dlí -“cine, dath, náisiúntacht nó bunadh eitneach nó náisiúnta" ina measc. 

Ba chóir do gach duine an cheist seo a fhreagairt bíodh creideamh acu nó ná bíodh.  Ní bhaineann an cheist seo lena mhinice a théann tú chuig an Aifreann nó áit eile urnaí.

Ba chóir do dhaoine an cheist a fhreagairt bunaithe ar mar a mhothaíonn siad faoina gcreideamh reiligiúnda, más ann dó.  Baineann an cheist le reiligiún nó creideamh reatha an duine agus ní faoi chreideamh ar leis a tógadh duine.

Má tá creideamh agat,  cuir marc sa bhosca a bhaineann leatsa. Mura bhfuil do chreideamh tugtha, breac é sa bhosca a chuirtear ar fáil ag deireadh na ceiste. 

Cuideoidh do fhreagra ar an gceist seo linn an líon daoine atá in ann an teanga náisiúnta a labhairt a aithint agus a mhinice agus chomh paiteanta is a labhraíonn siad í.  Cuideoidh sin linn tuiscint a fháil ar úsáid na teanga agus líofacht na teanga i measc an daonra.  

Is ceist nua í seo.  Cuideoidh na freagraí le hanailís a dhéanamh ar an tionchar a bhain le héirí aníos i dteach inar labhraíodh Gaeilge ar úsáid na teanga agus líofacht inti, níos faide amach.

Cuireann torthaí daonáirimh maidir stádas sláinte agus míchumais an daonra faisnéis thábhachtach ar fáil ar shláinte na ndaoine tríd is tríd.  Tá siad tábhachtach chun na seirbhísí sláinte a theastaíonn chun ár riachtanais a shásamh a aithint.

Maidir leo sin atá faoi mhíchumas/faoi mhíchumais, cuideoidh do fhreagra (do fhreagraí) linn tuiscint a fháil ar an tionchar atá ag míchumas/míchumais ar an saol laethúil.  Cuideoidh sin le muid a chur ar an eolas maidir le tacaíochtaí a d'fhéadfadh a bheith ag teastáil. 

Bíonn ceangal láidir idir mar a mheasann daoine atá a sláinte agus mar atá a sláinte i ndáiríre.  D'fhéadfadh freagraí ar an gceist seo cuidiú linn an bhaint atá ag stádas sláinte le nithe mar aois, áit agus stádas eacnamaíochta a mheas.

Is ceist nua í seo. Tabharfaidh na freagraí léargas ar chúrsaí caitheamh tobac ar fud na tíre.

Déanfar anailís ar maidir le modh taistil i gcomhréir leis an seoladh ag a bhfuil daoine ag obair/ar scoil/ar coláiste/i gcúram leanaí.  Cuirfidh na torthaí faisnéis luachmhar ar fáil maidir le patrúin chomaitéireachta chun seirbhísí agus bonneagair iompair phoiblí a phleanáil.  Aithneofar leis na gnáthmhodhanna taistil na modhanna éagsúla iompair a mbaineann comaitéirí úsáid astu.

Déanfar anailís ar an t-am a fhágann tú an baile i gcomhréir leis an seoladh ag a bhfuil daoine ag obair/ar scoil/ar coláiste/i gcúram leanaí. Cuirfidh sin faisnéis ar fáil ar an méid taistil comaitéara a dhéantar de réir an chineáil iompair ag tráthanna éagsúla i rith an lae.  

Déanfar anailís ar an t-achar a ghlacann an turas i gcomhréir leis an seoladh ag a bhfuil daoine ag obair/ar scoil/ar coláiste/i gcúram leanaí. Cuirfidh na torthaí faisnéis luachmhar ar fáil maidir le patrúin chomaitéireachta chun seirbhísí agus bonneagair iompair phoiblí a phleanáil agus faisnéis ar éifeachtacht no modhanna éagsúla iompair.

Cuideoidh na freagraí ar an gceist linn a mheas a mhéid a chuirtear cúnamh pearsanta gan íoc ar fáil ó chúramóirí i sochaí na hÉireann. Cuideoidh siad linn freisin tuiscint a fháil ar thréithe déimeagrafacha agus socheacnamaíochta na gcúramóirí féin.

Is ceist nua í seo. Ta oibrithe deonacha an-tábhachtach do go leor eagraíochtaí ar fud na tíre.  Tabharfaidh do fhreagra (do fhreagraí) léargas dúinn ar an líon oibrithe deonacha atá ann, chomh maith leis na ceantair agus na cineálacha eagraíochtaí ina mbíonn siad ag obair go deonach.

Cuireann an cheist seo daoine atá faoi 15 bliana d'aois ar aghaidh chuig Ceist 35.  Má tá tú os cionn 15 bliana d'aois, lean ar aghaidh chuig Ceist 26.

Bainfear úsáid as na freagraí ar an gceist seo chun monatóireacht a dhéanamh ar an tionchar atá ag beartais oideachais, leibhéil scileanna atá ag athrú agus chomh mór is a bhaineann daoine úsáid as a gcuid cáilíochtaí foirmeálta. 

Mar aon le Ceist 26, tabharfaidh na freagraí ar Cheist 27 léargas sonraithe ar scileanna agus ar cháilíochtaí an daonra, agus cuideoidh linn tuiscint níos fearr a fháil ar na riachtanais traenála agus scileanna atá againn.

Is féidir tuilleadh eolais a fháil ar cháilíochtaí, lena n-áirítear cáilíochtaí eachtrannacha, ag http://www.qqi.ie/Pages/Home.aspx

Cuideoidh do fhreagra ar an gceist seo linn líon na ndaoine atá ag obair, atá dífhostaithe agus ar scor a aithint chomh maith leis an líon mac léinn.  Is faisnéis thábhachtach í sin chun tuiscint a fháil ar chúrsaí eacnamaíochta na tíre agus do cheantair. 

Ag brath ar an bhfreagra a thug tú ar Cheist 28, cuirfidh an cheist seo ar aghaidh tú chuig an gcéad cheist eile a bhaineann leat.

Tabharfaidh freagraí ar an gceist seo léargas dúinn ar chomhdhéanamh eacnamaíochta agus fostaíochta an daonra, líon na bhfostaithe agus na bhfostóirí go háirithe.

Cuidíonn faisnéis maidir leis na slite beatha atá ag daoine atá ag obair, dífhostaithe nó ar scor linn tuiscint níos fearr a fháil ar chúrsaí fostaíochta in Éirinn agus na treochtaí atá ann i ndáil leis an méadú agus laghdú atá ar shlite beatha, ní atá tábhachtach chun pleanáil eacnamaíochta a dhéanamh.

Cuirtear daoine atá ar scor ar aghaidh chuig Ceist 37.  Ba chóir do dhaoine atá ag obair / dífhostaithe Ceist 33 a fhreagairt.

Má tá tú fostaithe, iarraimid ort cur síos sonraithe a thabhairt ar an ngnó atá ag d'fhostóir reatha. Má tá tú dífhostaithe, tabhair an gnó a bhí ag an bhfostóir deireanach a bhí agat le fios.  Cuideoidh an fhaisnéis sin chun tuiscint a fháil (ar na hathruithe) ar fhostaíocht sna hearnálacha tionsclaíochta éagsúla atá i ngeilleagar na tíre. 

Treoirlínte maidir le Ceist 33 a fhreagairt

• Tá sé thar a bheith tábhachtach go dtugtar cur síos sonraithe
• Níor chóir ach do dhaoine atá ag obair nó atá dífhostaithe an cheist seo a fhreagairt
• Ní gá do dhaoine atá ar scor í a fhreagairt
• Ní mór do fhreagraí a bheith beacht, e.g.:

Má tá tú dífhostaithe, tá do chuidse den fhoirm daonáirimh comhlánaithe anois agat.  á tá tusa (nó an té a bhfuiltear ag freagairt thar a cheann) ag obair/ar scoil i gcúram leanaí, freagair Ceist 35 le do thoil.

Mar aon leis na ceisteanna eile roimhe seo maidir le fostaíocht agus oideachas, cuideoidh an cheist seo linn léargas sonraithe a fháil ar an áit a dtéimid ar scoil, ar coláiste, chuig cúram leanaí nó chun na hoibre gach lá.  Tá sin tábhachtach le go mbeifear in ann na riachtanais iompair atá againn a thuiscint agus a phleanáil.

Is ceist nua í seo. Is saincheist shóisialta agus eacnamaíochta thábhachtach é rochtain ar chúram leanaí.  Mar aon leis na ceisteanna eile roimhe seo maidir le cúram leanaí, tabharfar tuiscint níos fearr ar na seirbhísí cúraim leanaí atá ar fáil agus an riachtanas atá ann do na seirbhísí sin.  Cuideoidh sé léargas níos fearr a fháil ar na cineálacha cúraim leanaí atá á n-úsáid sa lá atá inniu ann.

Seo deireadh do chuid ceisteanna. Freagair anois le do thoil na ceisteanna maidir leis na daoine eile i do theach (más ann dóibh). Mura bhfuil aon duine eile sa teach, sínigh le do thoil an fhoirm ar leathanach 23.  Más rud é go mbíonn daoine eile sa teach de ghnáth ach go bhfuil siad as láthair an 23 Meán Fómhair, freagair na ceisteanna atá ar leathanach 22 thar a gceann, agus sínigh an fhoirm ar leathanach 23 ansin. Go raibh maith agat as páirt a ghlacadh!